Hoʻolauna
Sam L. Noʻeau Warner
I Mua Nō Ka ʻUlu
He papahana ʻo I Mua Nō Ka ʻUlu i ulu mai nei mai loko mai o ka ʻiʻini e hoʻolako aku i ka poʻe ʻakahiakahi o ka ʻaʻapo ʻana mai i ka ʻōlelo kanaka i nā puke ʻōlelo kanaka, a ʻoi loa aku hoʻi nā keiki, nā ʻōpio a me nā mākua o nā kula kaiapuni. Ua haku ʻia kēia mau moʻolelo me ka manaʻo e lilo lākou i mea e ikaika mai ai ka ʻōlelo a nā kumu me nā haumāna ma nā kula, a pēlā hoʻi nā mākua me nā keiki ma nā ʻohana. A e lilo nō hoʻi ua mau puke nei i kumu e loli ai ke ʻano o ia mea he aʻo ʻōlelo na nā kumu me nā haumāna kula kaiapuni. A ʻo ka pahu hopu nui, ʻo ia ka hoʻomāhuahua ʻia ʻana mai o ka ʻōlelo ʻōiwi e moni ʻia e nā keiki i ʻane like aku nō kā lākou ʻōlelo ma kēia hope aku me kā nā mākua a me kā nā kūpuna o ka wā walewaha o ka ʻōlelo kanaka. Na ke au o ka manawa e haʻi mai.
He papahana ʻo I Mua Nō Ka ʻUlu na Sam L. Noʻeau Warner. Paʻi ʻia nā puke e Ka Lau ‘Ulu me ke kākoʻo o Ka ʻOihana Hoʻonaʻauao Pekelala ma o kekahi mau puʻu kālā no ka Hoʻonaʻauao ʻŌiwi Hawaiʻi ma lalo o nā papahana ʻo Noʻeau a me I Mua Nō Ka ʻUlu.
I hoʻokumu ʻia ka papahana ʻo Noʻeau i mea e hoʻonaʻauao ākea ʻia ai ka lehulehu i ka ʻōlelo makuahine o ko kākou paeʻāina, a noʻeau mai ai hoʻi ko kākou hoʻohana ʻana i ua ʻōlelo aloha nei. Ma o ka heluhelu ʻana a me ka hoʻolohe ʻana nō hoʻi i ka ʻōlelo Hawaiʻi o kēia mau puke kamaliʻi, pēlā e ikaika ai ka ʻōlelo a ke kaiāulu ʻōlelo Hawaiʻi mai ʻō a ʻō.
ʻO kekahi hopena koʻikoʻi o ua papahana nei, ʻo ia hoʻi ka paipai ʻana i ka lāhui Hawaiʻi i ka ʻimi ʻana i ka naʻauao ma nā pae like ʻole o ka hele kula ʻana a pau pū hoʻi me nā haumāna laeoʻo a laeʻula paha o ke kulanui.
He kukui pio ʻole ia no ka lāhui Hawaiʻi e ao ai i ka lamakū o ka noʻeau!
The Noʻeau program was created to educate the Hawaiian community about the mother tongue of our Hawaiian archipelago to increase our knowledge and usage of our beloved language. By reading these children’s books and listening to these audiobooks, we are able to strengthen the proficiency of the Hawaiian-speaking community at large.
Another important goal of this program is to encourage Hawaiians to engage in educational pursuits at all levels of schooling, including at the university level, by earning master's and doctoral degrees.
He kukui pio ʻole ia no ka lāhui Hawaiʻi e ao ai i ka lamakū o ka noʻeau!
